Kersat.....Pesada Pedua, Marpelo Tingki Dakdanak

PELO KACCA

Ue tahe dongan, diingot hamu dope tahe marpelo? Tikki dakdanak di huta najolo, on do meam-meam molo jeda sikkola. Dung mulak pe sikkola, olo dope disangahon marpelo di alaman rap dohot dongan dakdanak.

Molo di Parsoburan, Habinsaran, Toba Samosir, marpelo adong dua massamna. Ima marpelo garis dohot marpelo goba manang sipata didok marpelo gobang. Dos do lapatanni i. Molo marpelo garis jumolo ma dibaen garisna. Diorgoshon ma tutu talapak ni pat tu tano i laho mambaen garis. Rupana songon empat persegi panjang ma.

“Kersat,” ina dongan laho mandok ibana ma parjolo. Dungi dipeakhon dongan naasing ma pelo na hira-hira sameter sian garis i. Alai andorang so dipungka meam-meam i, di tingki na mambaen garis somalna ma digorahon, “pesada..pedua...petolu..peopat....”. Pesada sabotulna hata jempek ni parjolo do. Manang ‘pertama’ molo hata Indonesiana. Songoni nang pedua, hata jempek ni paduahon do, di bahasa Indonesia sarupa mai ‘kedua’.

Molo marpelo gobang jumolo ma antong dilubangi tano i, na sabalga ni pelo i. Manang umbalga saotik. Ise na parjolo boi pamasuk pelo tu goba i, ba ibana ma na monang. Jala adong garis ni pelo goba. Tudia pe lao pelo i, dang pola parsoalan.

Molo diingot-ingot, jumotjot do diulahon dakdanak marpelo garis. Molo jumpang ari Minggu manang ari Selasa, tung mansai godang ma tutu angka dakdanak marpelo. Dung mulak sian sikkola minggu, jala dung mulak sian sikkola ari Selasa na. Ari Selasa di Parsoburan memang apala topet doi ari onan. Dang pola disuru tu pollak manang tu hauma. (IP/marudut dope sarita on ate)